المذاكرة الجامعية

فيه ناس كتير بيحصل عندهم لخبطة نتيجة لاختلاف أسلوب المذاكرة في الجامعة عن أيام الدراسة اللي كان فيها مدرس بيساعد وبيشرح كل حاجة، بالإضافة إلى أن المنهج كمان محدد وواضح.. لكن الجامعة طبعا مجال الدراسة فيها واسع جدا ومش مقصور على كتاب وبس...
1. بصراحة كده ومن غير مقدمات، حضور المحاضرات ده شيء مهم جدا وضروري واوعوا تسمعوا كلام حد يقول لكم إن حضور المحاضرات مش مهم، وده لسبب بسيط جدا هو إن الدكتور بيقول كلام مفيد جدا ومهم وبييجي في الامتحان الكلام ده، وبيكون مش موجود في الكتاب وده بيكون الفرق بين الطالب اللي بيجيب امتياز واللي بيجيب مقبول.

2. خدوا بالكم إن المذاكرة بتعتمد على الفهم والتحليل مش على الحفظ علشان كده لازم تكونوا إيجابيين وتناقشوا الدكتور في المحاضرة لتوضيح النقط غير المفهومة.
3. ابحثوا عن المعلومة في كل مكان سواء في مكتبة الكلية أو مكتبة الجامعة أو المكتبات العامة أو على الإنترنت وده لأن أهم حاجة في التعليم الجامعي هي البحث عن المعلومة.
4. المذاكرة أول بأول شيء ضروري جدا واوعوا تسمعوا الكلام اللي بيقول إن المذاكرة في الجامعة مش محتاجة غير آخر شهر وبس لأن ده غلط بيقع فيه ناس كتير قوي وبتكون النتيجة إن المنهج بيكون كتير ومش بيقدروا إنهم يجمعوه في آخر شهر.
5. وعلى فكرة المراجعة المستمرة شيء مهم جدا وكمان عمل ملخص لأهم النقاط اللي بيحتوي عليها المنهج شيء مهم وبيساعد على تثبيت المعلومة وفهمها والربط بين الموضوعات.

بجد والله موضوع مييز وجميل وحبقه اجربه

وانا على طول بحضر المحاضرات بس المهمه طبعا

والسكاشن مش بفوتها طبها لانها اهم حاجه

شكرا ليكى على الموضوع الجميل ده

موضوع جميل
بس نقطة اننا نناقش الدكاتره ديه صعبه
لانهم مش بيسمحوا بكده دايما للاسف
وموضوع اللخبطه اللى بتحصل فى الفرق
بين الدراسه المدرسيه والجامعيه ده وارد جدا
واهم حاجه فى الجامعه لا تؤجل عمل اليوم الى الغد
نصيحه مجربه
وتسلم ايدك يا بنت اهلاويه

شكرا لرددكم الجميله